PSG睇定食吼半和有着「素」

歐聯「死亡F組」大戰，紐卡素主場硬撼巴黎聖日耳門（PSG）。紐卡素首輪力戰AC米蘭保住1分，今仗遇強必定繼續防守，PSG王牌基利安麥巴比狀態飄忽，作客亦唔會太進取，加上佢哋近4仗歐聯全開半場和，不妨再追。

「喜鵲」季初一度3連敗，主帥艾迪侯域作出調整，唔再以強隊自居，改用較保守打法之後果然有起色，各項賽事近5仗4勝1和兼保持0失球，包括歐聯首輪造訪AC米蘭，面對這支意甲勁旅狂轟猛炸，幸門將尼克普比力挽狂瀾，成功令球隊站穩陣腳，最終守和0比0。之後球隊喺英聯盃1比0小勝曼城，更令上下信心大增，相信今仗會繼續先做好防守，然後搵機會制勝。

PSG於歐聯首輪輕取多蒙特2比0，不過先開紀錄嘅基利安麥巴比早前受傷，雖然呢位法國王牌已經傷愈，上仗法甲對克萊蒙特亦有披甲，結果場波踢成0比0，明顯「麥總」缺少比賽不在狀態，勢必影響攻力。查實PSG出戰歐聯一向穩陣行先，連同上屆在內，近4仗歐聯全開半場和，預計佢哋今仗初段未必攻得入紐卡素，半場和有計。