PSG捧法冠盃　麥巴比李康仁齊創紀錄

周四(4日)凌晨法國冠軍盃，由上季法甲冠軍巴黎聖日耳門(PSG)主場對上屆法足總盟主圖盧茲，富豪球會PSG始終技術一籌，以2比0勝出，成功衞冕呢項錦標，球星基利安麥巴比今仗射入1球，以111球成為PSG史上主場射手王，南韓國腳李康仁成為首位喺法冠盃入波嘅亞洲球員。

開賽3分鐘，PSG就由李康仁射入迅速打開紀錄，圖盧茲隨即傾力反擊，但前鋒達寧加射門中柱彈出，注定冇運行。臨完上半場，基利安麥巴比個人表演，扭過對方球員，殺入禁區射成2比0，呢位法國前鋒加盟PSG以來，已經喺主場賽事累積入111球，超越卡雲尼，成為PSG史上主場入波最多嘅球員。換邊之後，PSG有機會拉開紀錄，但阿舒拉夫主射罰球中柱唔入，幸好無阻球隊奪冠。

近11屆法冠盃，有10次由巴黎聖日耳門奪得，佢哋至今累積12次奪得呢項錦標，屬於各隊之冠，比第2位里昂多4次。